<p><strong>Sumqayıtda 33 yaşlı tanışını öldürməkdə şübhəli bilinən şəxs tutulub.</strong></p><p>Bu barədə <span class="red"><a target="_blank" href="https://axar.az">Axar.az</a></span>-a Sumqayıt Şəhər Prokurorluğundan məlumat verilib.</p><p>Belə ki, dekabrın 17-də, saat 14 radələrində Sumqayıt şəhərinin Corat qəsəbəsi ərazisində 1989-cu il təvəllüdlü Cavid Şirməmmədovun aldığı bıçaq xəsarətləri səbəbindən ölməsi faktı ilə bağlı Sumqayıt şəhər prokurorluğunda Cinayət Məcəlləsinin 120.1-ci (qəsdən adam öldürmə) maddəsi ilə cinayət işi başlanıb.</p><p>Aparılmış araşdırmalarla zərərçəkmişin tanışı, həmin qəsəbənin sakini 1985-ci il təvəllüdlü Azər Dadaşovun şəxsi münasibətlər zəminində aralarında yaranmış münaqişə zamanı bıçaqla xəsarətlər yetirərək Cavid Şirməmmədovu qəsdən öldürməsinə əsaslı şübhələr müəyyən edilib.</p><p>Azər Dadaşov şübhəli şəxs qismində tutulub.</p><p>Hazırda iş üzrə istintaq davam edir.</p>
<p><strong>Dekabrın 18-də İranın Qum şəhərində 4 molla soyuq silahla hücuma məruz qalıb.</strong></p><p><span class="red"><a target="_blank" href="https://axar.az">Axar.az</a></span> xəbər verir ki, bu haqda Tibb Universitetinin ictimaiyyətlə əlaqələr bölməsi məlumat yayıb.</p><p>Din xadimlərinin vətəndaşların geyim tərzlərinə irad bildirməsi, onları təhqir etməsi səbəbindən döyüldüyü bildirilir.</p><p>Məlumata görə, mollalardan ikisi ambulator müalicədən sonra evə buraxılıb, ikisi isə ağır vəziyyətdə xəstəxanaya yerləşdirilib.</p><p>Qeyd edək ki, xüsusilə son illərdə İranın müxtəlif yerlərində mollaların vətəndaşların şəxsi həyatına müdaxilələri onların döyülməsi, bir sıra hallarda öldürülmələri ilə nəticələnib.</p>
<p><strong>Əcnəbilər və vətəndaşlığı olmayan şəxslər üçün iş icazəsinin alınması tələb olunmayan halların sayı artır.</strong></p><p><span class="red"><a target="_blank" href="https://axar.az">Axar.az</a></span> xəbər verir ki, bu, Milli Məclisin İqtisadi siyasət, sənaye və sahibkarlıq komitəsinin bu gün keçirilən iclasında müzakirəyə çıxarılan Vergi Məcəlləsinə təklif olunan dəyişiklikdə əksini tapıb.</p><p>Bu hal texnologiyalar parkının rezidentinə (hüquqi şəxsə münasibətdə onun rəhbəri və müavinləri vəzifəsini tutanlar) və həmin rezident tərəfindən Azərbaycan Respublikasının ərazisində əmək fəaliyyətinə cəlb edilən informasiya və kommunikasiya texnologiyaları sahəsində təcrübəsi olan mütəxəssislərə də şamil olunacaq.</p><p>Başqa sözlə, qanun layihəsinə əsasən iş icazəsinin alınması tələb olunmayan əcnəbilər və vətəndaşlığı olmayan şəxslərin dairəsinə texnologiyalar parkının rezidenti və həmin rezident tərəfindən ölkə ərazisində əmək fəaliyyətinə cəlb edilən informasiya və kommunikasiya texnologiyaları sahəsində təcrübəsi olan mütəxəssislər əlavə olunur. Buna uyğun olaraq, həmin şəxslərə Azərbaycan Respublikasının ərazisində müvəqqəti yaşamaq üçün icazənin verilməsi nəzərdə tutulur.</p>
<p><strong>Səhiyyə Nazirliyində rezidentura təhsilini bitirən həkim-mütəxəssislərin təyinatı və iş yerlərinə göndərilməsi həyata keçirilib.</strong></p><p>Bu barədə <span class="red"><a target="_blank" href="https://axar.az">Axar.az</a></span>-a nazirlikdən məlumat verilib.</p><p>Bildirilib ki, həkim-mütəxəssislərin bir hissəsi bölgələrdə işləməyə üstünlük veriblər.</p><p>Əksəriyyəti isə Bakı şəhərində yerləşən tibb müəssisələrini, o cümlədən "Yeni Klinika", Mərkəzi Neftçilər Xəstəxanası, Elmi Cərrahiyyə Mərkəzi, Analitik Ekspertiza Mərkəzi, Milli Onkologiya Mərkəzi, Mərkəzi Klinika, V.Axundov adına Elmi-Tədqiqat Tibbi Profilaktika İnstitutu, Elmi-Tədqiqat Ağciyər Xəstəlikləri İnstitutu, Respublika Neyrocərrahiyyə Xəstəxanası, Respublika Klinik Xəstəxana, Respublika Uşaq Klinik Xəstəxanası, Elmi-Tədqiqat Travmatologiya və Ortopediya İnstitutu, Respublika Gigiyena və Epidemiologiya Mərkəzi, QİÇS-lə mübarizə Mərkəzini, eyni zamanda Bakı şəhəri üzrə digər tibb mərkəzlərindəki vakant həkim vəzifələrini seçiblər və onlara həmin tibb müəssisələrinə göndəriş verilib.</p><p>Naxçıvan Muxtar Respublikasında yaşayan həkim-mütəxəssislərin iş yerlərinə göndərilməsi ilə bağlı Naxçıvan Muxtar Respublikasının Səhiyyə Nazirliyinə müraciət olunub.</p><p>Qanunvericiliyə uyğun olaraq, təyinat üzrə iş yerlərinə göndəriş verilən həkim-mütəxəssislər əmək fəaliyyətlərini 3 il müddətində həmin tibb müəssisəsində davam etdirməlidirlər.</p><p>Növbəti tədris ilindən etibarən təyinatın elektron xidmət vasitəsilə həyata keçirilməsi nəzərdə tutulur. Bununla bağlı Səhiyyə Nazirliyi tərəfindən normativ sənəd layihəsi hazırlanıb və təsdiq olunduqdan sonra tətbiq ediləcəkdir.</p>
<p><strong>Ətraf mühitə və inkişafa dair Rio-de-Janeyro Bəyannaməsinə görə, müharibələr davamlı inkişaf prosesinə dağıdıcı təsir göstərməməlidir. Ona görə də dövlətlər silahlı konfliktlər zamanı ətraf mühiti mühafizə edən beynəlxalq hüquqa hörmət etməlidirlər. Lakin, ermənilər nəinki bu prinsipləri gözləmədi, əksinə həmin prinsipləri kobud surətdə pozaraq işğal etdikləri ərazilərdə təbiəti viran qoydular. Ermənilər işğal etdikləri ərazilərdə 30 il qiymətli sərvətləri amansızcasına dağıtdılar, Ermənistana daşıdılar, daşınması mümkün olmayanları isə yandırmaqla ekologiyaya ciddi ziyan vurdular. Ermənilərin meşələrdə hər il mütəmadi olaraq törətdiyi yanğınlar min hektarlarla ərazini əhatə etməklə bərabər, digər ərazilərə də yayılaraq ətraf mühitə və canlı təbiətə ciddi ziyan vurdu. Ümumiyyətlə, Ermənistan tərəfindən ekoloji terrora məruz qalan Azərbaycan əraziləri regional ekoloji fəlakət zonasına çevrilib. Ermənistanın sabiq rəhbərləri R.Köçəryan və S.Sərkisyanın işğal dövründə törətdikləri hərbi cinayətlərini və qeyri-qanuni iqtisadi əməllərini indi də kriminal iş adamı olan Ruben Vardanyan davam etdirir.</strong></p><p><span class="red"><a target="_blank" href="https://axar.az">Axar.az</a></span> xəbər verir ki, bu sözləri mətbuata açıqlamasında Milli Məclisin deputatı Kamaləddin Qafarov deyib.</p><p>Deputat qeyd edib ki, ərazini ən çox çirkləndirən Ermənistanın cənub-şərqində yerləşən Zəngəzur mis-molibden kombinatı, ikincisi isə Ermənistanın cənub-şərqində, Qafan şəhərindən 1,5 km şərqdə, Oxçuçay çayının aşağı axınında yerləşən Qafan mədən və emal zavodudur:</p><p>”Son on ildə Ermənistan fabriklərindən ağır metalların sızması səbəbindən Oxçuçay çirklənmə mənbəyinə çevrilib. Üstəlik, son iki il ərzində Laçın yolu ilə Xankəndiyə davamlı silah, hərbi qüvvə axını olub. Bu da 2020-ci ildə imzalanmış üçtərəfli Bəyannamənin şərtlərini, xüsusilə bütün erməni hərbçilərinin bu ərazidən çıxarılması ilə bağlı 4-cü bəndi pozur. Rusiya vətəndaşlığından imtina edib Qarabağa gələn kriminal iş adamı Ruben Vardanyan isə ekoloji fəsadları nəzərə almadan Qarabağ yataqlarında qızıl tərkibli və mis-molibden filizlərinin qanunsuz hasilatına başlayıb. Bunu nəzərə alaraq Azərbaycan ekoloqları təbii sərvətlərin qeyri-qanuni istismarı, habelə ekoloji vəziyyətin pisləşməsi ilə bağlı ilkin monitorinq keçirmək istəsə də, dövlət qurumlarının nümayəndələrinin və mütəxəssislərin əraziyə girişinə maneçilik törədildi. Bu səbəbdən də bir neçə gündür Laçın-Şuşa yolunda Azərbaycan vətəndaş cəmiyyəti nümayəndələrinin və ekoloqların etiraz aksiyası keçirilir. Dinc xarakterli bu aksiyada tələb ekologiyanı pozan, təbii sərvətləri talan edən separatçıların əməllərinə son qoyulması, Azərbaycanın sözügedən ərazilərində təbii sərvətlərin qeyri-qanuni istismarının dayandırılması, bütün təbii sərvətlərin istismarının Azərbaycan Respublikası qanunvericiliyi əsasında həyata keçirilməsidir”.</p><p>K.Qafarov bildirib ki, ermənilərin Laçın yolunun bağlanması iddiasına gəlincə, bu sadəcə erməni həyasızlığıdır:</p><p>“Görünən odur ki, yolu Azərbaycanın vətəndaş cəmiyyətinin etiraz edən nümayəndələri deyil, məhz Rusiya sülhməramlı kontingenti bağlayıb. Azərbaycan isə dövlət səviyyəsində Qarabağda yaşayan bütün erməni vətəndaşlarına humanitar dəstəyi verməyə hazır olduğunu bildirib. Sadəcə su bulandırmaqla, məsələni yanlış formada şərh etməklə Ermənistan Azərbaycanın daxili işlərinə müdaxilə edir. Bu cür bəyanatlar Ermənistan baş nazirinin Praqa və Soçidə Azərbaycanın ərazi bütövlüyü və suverenliyinə hörmət edilməsi üzrə qəbul etdiyi öhdəliklərə ziddir. Azərbaycan fəallarının sülh aksiyası Qarabağda yaşayan ermənilər üçün heç bir təhdid yaratmır. Keçirilən sülh aksiyası səbəbindən Qarabağ ermənilərinin yaşadığı ərazilərin qazla təchizatı dayandırılmayıb və həyati əhəmiyyətli yüklərin keçməsinə maneçilik törədilmir. Rusiya sülhməramlılarının müvəqqəti yerləşdiyi ərazilərdə qaz təchizatı Ermənistan tərəfindən həyata keçirilir və sözügedən ərazilər ölkəmizin qaz təchizatı sisteminə hələ ki inteqrasiya olunmayıb. Ona görə də Ermənistanın absurd bəyanatları heç nəyi dəyşməyəcək və Azərbaycan dövləti öz ərazisində ekoloji terror törədilməsinin, qanunsuz silahların daşınmasının, təbii sərvətlərin talan edilməsinin qarşısını qətiyyətlə alacaqdır. Bu Vətən bizimdir!”.</p>
<p><strong>Ermənistanın maliyyə naziri Tiqran Xaçatryan ölkənin baş nazirinin müavini təyin olunub.</strong></p><p><span class="red"><a target="_blank" href="https://axar.az">Axar.az</a></span> xəbər verir ki, bu barədə erməni mediası məlumat yayıb.</p><p>Maliyyə naziri vəzifəsinə isə Vaqe Ovannesyan təyin olunub.</p><p>Qeyd edək ki, dekabrın 12-də Ermənistan baş nazirinin müavini Ambarsum Matevosyan istefa verib.</p>
<p><strong>Bakının Xətai rayonu, NZS qəsəbəsi ərazisində 3 nəfərin bıçaqlanması ilə nəticələnən davanın bəzi təfərrüatları məlum olub.</strong></p><p><span class="red"><a target="_blank" href="https://axar.az">Axar.az</a></span> <a target="_blank" href="https://az.trend.az">Trend</a>-ə istinadən xəbər verir ki, hadisə qəsəbə ərazisində fəaliyyət göstərən 165 saylı tam orta məktəbin yaxınlığındakı küçədə baş verib. Hadisə qız söhbəti üstündə olub.</p><p>Məlumata görə, hadisə nəticəsində qətlə yetirilən 2004-cü il təvəllüdlü Nemət Həsənov dalaşanlar arasında olmayıb. Belə ki, NZS qəsəbə sakini, 2005-ci il təvəllüdlü Fərid Əhmədli ilə həmyaşıdı Orxan Hüseynov arasında qız üstündə mübahisə olub. Mübahisə nəticəsində O. Hüseynov və F. Əhmədli dalaşıb və yaxınlıqdakı şəxslərin köməyi ilə tərəflər sakitləşdirilib. Axşam saatlarında hər iki şəxs yenidən mübahisə edib və onlar axşam saat 23 radələrində 165 saylı orta məktəbin yanında söhbəti həll etmək üçün görüş təyin edib. Növbəti mübahisə yenidən davaya çevrilib və bu vaxt F. Əhmədli O. Hüseynovu bıçaqlayıb. Həmin vaxt ərazidə olan Xalid Nəbiyev və Nemət Həsənov F. Əhmədliyə mane olmağa çalışıb. F. Əhmədli isə X. Nəbiyevi qarın nayihəsindən, N. Həsənovu isə ürəyindən bıçaqlayıb. Nəticədə Nemət Həsənov xəstəxanaya aparılsa da, onun həyatını xilas etmək mümkün olmayıb.</p><p>Xatırladaq ki, dekabrın18-i saat 23 radələrində paytaxtın Xətai rayonu ərazisində 2004-cü il təvəllüdlü Nemət Həsənovun öldürülməsi faktı ilə bağlı Xətai rayon prokurorluğunda Cinayət Məcəlləsinin 120.1-ci (qəsdən adam öldürmə) maddəsi ilə cinayət işi başlanıb.</p><p>Hadisəni törətməkdə şübhəli bilinən 2005-ci il təvəllüdlü Fərid Əhmədli şübhəli şəxs qismində tutulub.</p>
<p><strong>Moskvada qarın hündürlüyü 34 santimetrə çatıb.</strong></p><p><span class="red"><a target="_blank" href="https://axar.az">Axar.az</a></span> xəbər verir ki, bunu “Fobos” hava mərkəzinin aparıcı mütəxəssisi Mixail Leus deyib.</p><p>“Bu, qışın əvvəlindən bəri ən yüksək göstərici və 1941-ci ilin 19 dekabrında müəyyən edilmiş qar örtüyünün hündürlüyünə görə gündəlik rekordun təkrarıdır”, - Leus bildirib.</p><p>Qeyd edək ki, ötən gün də Moskvaya rekord həcmdə qar yağmışdı.</p>
<p><strong>Naxçıvan hadisələri ilə bağlı Azərbaycanda əhalinin kifayət qədər məlumatı yoxdur.</strong></p><p><span class="red"><a target="_blank" href="https://axar.az">Axar.az</a></span> xəbər verir ki, bu sözləri Azərbaycan Demokrat Partiyasının sədri Sərdar Cəlaloğlu Reaksiya TV-nin efirində deyib.</p><p>O bildirib ki, hər şey Azərbaycanda Birinci vitse-prezidentin təyinatı ilə başlayıb:</p><p>“Konstitusiya dəyişikliyi olanda və Birinci vitse-prezidentlik institutu yaradılanda bu vəzifəni kimin tutacağı müzakirə edilirdi: Ramiz Mehdiyevin, Vasif Talıbovun və s. adı çəkilirdi. İlham Əliyev heç kəsin gözləmədiyi, çox ciddi bir gizliliklə addım atdı və Mehriban Əliyevanı Birinci vitse-prezident vəzifəsinə gətirdi, İran-Rusiya qüvvələrinə zərbə vurdu. Həmin epizoda təkrar baxa bilərsiniz: o təyinat zamanı Azərbaycanda Rusiya-İran “5-ci kolonu”nun nümayəndələrinin hamısı şoka düşdü. Bundan sonra onlar başladılar öz mövqelərini gücləndirməyə. İlk bəyanatı Əli Həsənov (Prezidentin sabiq köməkçisi, PA-nın keçmiş şöbə müdiri – red.) verdi. Əli Həsənovu Prezident ali məsləhətçi (köməkçi – red.) vəzifəsinə yüksəltmişdi. Əli Həsənovu məcbur etdilər ki, “Azərbaycanda bəzi adamlar Şirvan dövləti yaratmaq istəyir, biz buna imkan verə bilmərik, bunlar Azərbaycanı parçalamaq istəyir” bəyanatını versin. Bu sözlərin hədəfi kim idi? Əlbəttə, Mehriban Əliyeva.</p><p>Ondan sonra Ramiz Mehdiyev bəyanat verdi ki, biz İlham Əliyevdən başqa kim hakimiyyətə gələcəksə, onunla mübarizə aparacağıq. Bu söz kimə qarşı yönəlmişdi? Əlbəttə, Mehriban Əliyevaya.</p><p>Rusiya və İranın “5-ci kolon”u elə bir alternativ haqda düşünürdü ki, o, həm Heydər Əliyev tərəfdarlarını, həm də Naxçıvan-Ermənistan klanının maraqlarını ifadə etsin. Bunlar Heydər Əliyevin qohumu olan Vasif Talıbovun üzərində durdular. Başladılar Vasif Talıbovu prezident vəzifəsinə hazırlamağa. Vasif Talıbov da addım-addım Naxçıvanı Azərbaycanın suverenliyindən çıxarmağa başladı.</p><p>Baxın, İran Naxçıvanı işğal edəcəyi ilə bağlı açıqlama verir, ancaq nə Naxçıvan MR-in sədri, nə də digərləri İrana cavab verir. Niyə heç olmasa bir deputat çıxıb, İrana həddini göstərmir?”</p><p>S.Cəlaloğlu bildirib ki, İranın Naxçıvanla bağlı bəyanatının meydana çıxma vaxtı da təsadüf deyildi:</p><p>“İranın Zəngəzur dəhlizi ilə bağlı mövqeyi ilə Naxçıvana iddiası, təxminən, eyni vaxtda ortaya çıxdı. Məsələ budur ki, Zəngəzur dəhlizi ilə bağlı Rusiyanın da öhdəliyi var və İran Rusiyaya müqavimət göstərə bilməz. Deməli, Zəngəzur dəhlizinin açılmasının qarşısını almağa İranın imkanı yoxdur. Ona görə ikinci məsələ Naxçıvan MR-i təsir altına almaq qalır.</p><p>Faktiki olaraq ermənilər Zəngəzur dəhlizinin açılmasına hansı problemlər yaradırdısa, Vasif Talıbov da bu dəhlizə Naxçıvanda o cür problem yaradırdı.</p><p>İran açıq-açığına bəyanat verir ki, Naxçıvandan bəzi adamlar bizə müraciət ediblər ki, Naxçıvan İrana birləşməlidir. Naxçıvan niyə bunu aydınlaşdırmır? İran bununla bağlı göndərilən məktubu nümayiş etdirir. Vasif Talıbovun əleyhinə bir nəfər anonim məktub yazanda, dərhal tapırlar. Bəs, Naxçıvandan İrana məktub yazanları niyə indiyə qədər aşkara çıxarmayıblar?</p><p>Mənim aldığım məlumata görə, İranla bağlı Naxçıvan ərazisində işlər görən Azərbaycan vətəndaşlarının hamısına İran pasportu veriblər. Bu, çox böyük təhlükədir”.</p><p>S.Cəlaloğlunun sözlərinə görə, Naxçıvanda dövlət əleyhinə o qədər ciddi, Türkiyə-Azərbaycan birliyinə qarşı elə böyük addımlar atılıb ki, bu xəyanət cavabsız qala bilməzdi:</p><p>“Ramiz Mehdiyevin dəfələrlə Naxçıvana getməsi və hakimiyyətin ələ keçirilməsi ilə bağlı planlar cızdığı haqda çoxsaylı məlumatlar var”.</p><p>O qeyd edib ki, Vasif Talıbov faktiki olaraq Azərbaycanın qlobal layihəsinə qarşı çıxır:</p><p>“Buna isə nə onun, nə də havadarlarının gücü çatar”.</p>
<p><strong>FİFA-nın Qətərdə keçirilən dünya çempionatından nə qədər gəlir əldə etdiyi məlum olub.</strong></p><p><span class="red"><a target="_blank" href="https://axar.az">Axar.az</a></span> xəbər verir ki, bu barədə qurumun prezidenti Canni İnfantino bildirib.</p><p>“FİFA-nın Qətərdə keçirilən dünya çempionatında gəliri 10,5 milyard dollardır. Bu rəqəm dörd il əvvəlkindən 1 milyard dollar çoxdur”, - İnfantino bildirib.</p>
<p><strong>Azərbaycan, Türkiyə və Türkmənistan Dövlət Başçılarının II Üçtərəfli Zirvə Görüşü Azərbaycanda keçiriləcək.</strong></p><p><span class="red"><a target="_blank" href="https://axar.az">Axar.az</a></span> xəbər verir ki, bu barədə Azərbaycan, Türkiyə, Türkmənistan I Üçtərəfli Zirvə Görüşünun yekunlarına dair sənəddə bildirilib.</p><p>Qeyd edək ki, Birinci Üçtərəfli Zirvə Görüş Türkmənbaşı şəhərində keçirilib. Görüşdə hər üç ölkənin liderləri iştirak edib.</p>
<p><strong>15 dekabr tarixinə olan məlumata görə, dövlət büdcəsinə vergi daxilolmalarının həcmi ilk dəfə olaraq 15 mlrd. manatı keçib.</strong></p><p><span class="red"><a target="_blank" href="https://axar.az">Axar.az</a></span> xəbər verir ki, bu barədə iqtisadiyyat naziri Mikayıl Cabbarov Feysbuk hesabında paylaşım edib.</p><p>Nazir qeyd edib ki, qeyri-neft-qaz sektorundan daxilolmalar isə 7,9 mlrd. manata çatıb:</p><p>“Qeydə alınan bu rekord göstərici həyata keçirilən mütərəqqi iqtisadi islahatların, səmərəli vergi inzibatçılığı və əlverişli biznes mühitinin təmin edilməsinin, cəmiyyətdə vergi mədəniyyətinin yüksəlməsinin nəticəsidir. Öhdəliyini dürüst yerinə yetirən vicdanlı vergi ödəyicilərinə və Dövlət Vergi Xidmətinin əməkdaşlarına təşəkkürümüzü bildiririk”.</p>
<p><strong>Amerikalılar Ukrayna müharibəsi ilə daha çox maraqlanır, çünki müharibəyə ağ dərili kişilər, İran inqilabına isə Yaxın Şərq qadınları rəhbərlik edir.</strong></p><p><span class="red"><a target="_blank" href="https://axar.az/news/kult/">Kult.az</a></span> xəbər verir ki, bunu məşhur Hollivud aktrisası və qadın hüquqları müdafiəçisi Cessika Çesteyn deyib.</p><p>“Başda ABŞ olmaqla, bir sıra ölkələrin iranlı qadın etirazçılara dəstəyi iddia edilən səviyyədə deyil. Dünya mediasını iranlı qadınlar haqqında daha çox məlumat yaymağa çağırıram”, - aktrisa bildirib.</p>
<p><strong>Bu ilin yanvar-noyabr aylarında Gürcüstan turist səfərlərindən təxminən 3,2 milyard dollar gəlir əldə edib.</strong></p><p><span class="red"><a target="_blank" href="https://axar.az">Axar.az</a></span> xəbər verir ki, bu barədə Gürcüstanın Milli Turizm Administrasiyası məlumat yayıb.</p><p>Məlumata görə, bu göstəricilər 2019-cu ildə əldə edilmiş pandemiyadan əvvəlki nəticələri 3,5% üstələyir. Bununla yanaşı, ilin 11 ayında turizm sənayesinin gəlirləri ötən ilin müvafiq göstəricilərini 82,4 faiz üstələyib.</p><p>Noyabrda mənfəət 305 milyon dollardan çox olub. Bu da 2019-cu ilin müvafiq göstəricisindən 51,2%, 2021-ci illə müqayisədə isə 74,9% çoxdur.</p>
<p><strong>Krım yarımadasına və Rusiyanın digər bölgələrinə hücum üçün istifadə edilən PUA Amerikanın “Spektreworks” şirkəti tərəfindən istehsal edilib.</strong></p><p><span class="red"><a target="_blank" href="https://axar.az">Axar.az</a></span> xəbər verir ki, bu barədə RİA Novosti məlumat yayıb.</p><p>Qeyd edilib ki, Krıma və Rusiyanın digər subyektlərinə hücum edən PUA-lar Arizonada, daha sonra isə Polşada sınaqdan keçirilib.</p>
<p><strong>Dekabrın 15-i gecə saatlarında Tehran və başqa bir neçə şəhərdə rejimə qarşı etiraz aksiyaları keçirilib.</strong></p><p><span class="red"><a target="_blank" href="https://axar.az">Axar.az</a></span> xəbər verir ki, Tehran şəhərinin Çitgər, Səttarxan, Moniriyyə və Ekbatan bölgələrində başlayan aksiyalarda Əli Xamenei və Tehran rejiminə qarşı şüarlar səsləndirilib.</p><p>"Ölüm olsun qatil Xameneiyə", "Uşaq qatili hökuməti istəmirik", "Yoxsulluq, korrupsiya, bahalıq" və başqa bu kimi şüarlar səsləndirən etirazçılardan bir neçəsi həbs edilib.</p>
<p><strong>ABŞ hökuməti Çinin təhlükəsizlik kamerası və üztanıma avadanlıqlarının istehsalı ilə məşğul olan "Tiandi Technology" şirkətini qara siyahıya salıb.</strong></p><p><span class="red"><a target="_blank" href="https://axar.az">Axar.az</a></span> xəbər verir ki, bu barədə “NBC Nyus” telekanalı məlumat yayıb.</p><p>Bildirilir ki, şirkət Çin hökumətinə uyğur müsəlmanlarını və digər azlıqları müəyyənləşdirməyə kömək etmək üçün üztanıma texnologiyasını hazırlayıb. Sözügedən texnologiya SEPAH-a da təqdim edilib.</p><p>ABŞ Ticarət Nazirliyi bu ölkənin şirkətlərinin "Tiandi Technology" şirkətilə istənilən əməkdaşlığını qadağan edib.</p><p>Qeyd edək ki, ABŞ Ticarət Nazirliyi Çinin 35 texnologiya şirkətinə sanksiya tətbiq etmişdi.</p>
<p><strong>Seyfəli poliqonunda döyüş sursatlarının utilizasiyası keçirilir.</strong></p><p>Bu barədə <span class="red"><a target="_blank" href="https://axar.az">Axar.az</a></span>-a Müdafiə Nazirliyinin (MN) Mətbuat Xidmətindən bildirilib.</p><p>"Azərbaycan Ordusunun bölmələri tərəfindən istismar müddəti başa çatmış və istifadəyə yararsız olan döyüş sursatlarının təhlükəsizlik tədbirlərinə əməl olunmaqla planlı şəkildə utilizasiyası davam etdirilir.</p><p>Məlumat üçün bildiririk ki, döyüş sursatlarının utilizasiya prosesi dekabrın 16-dan 18-dək Seyfəli poliqonunda həyata keçiriləcək.</p><p>Aparılan partlayış işləri ilə əlaqədar ictimaiyyətə mütəmadi məlumat veriləcək", - məlumatda vurğulanıb.</p>
<p><strong>12 dekabr Ulu öndərin anım günündə Xankəndi-Şuşa yolunda başlayan dinc hərəkat müasir Azərbaycan tarixinin parlaq səhifəsidir. Əslində silahsız aksiya 44 günlük müharibənin davamıdır, 10 noyabr 2020-ci ildə Xankəndiyə doğru gedən əsgərlərin qardaş və bacılarının tanksız-topsuz əməliyyatıdır.</strong></p><p><span class="red"><a target="_blank" href="https://axar.az">Axar.az</a></span> xəbər verir ki, bu sözləri millət vəkili Zahid Oruc qeyd edib.</p><p>O bildirib ki, əgər Qızılbulaq və Dəmirli yataqlarına sülhlə deyil, hərbi vasitələrlə hücum edilsəydi, 12-14 sentyabrdan başlayan beynəlxalq təzyiqlər daha da artacaqdı:</p><p>“Düşmən bizi səngərdə gözləyirdi. İrəvanda, Parisdə və onlarla ölkədə Qarabağ ermənilərinə silahlı soyqırım edəcək dövlətə qarşı sanksiyalar öncədən hazırlanmışdı. Lakin İlham Əliyev dinc vasitələrdən - yumşaq gücdən istifadə etdi. Ona görə də çətin hava şəraitində 4 gündür fədakarlıq göstərən mətbuat, vətəndaş cəmiyyəti və ictimai fəallar gerçək silahsız xüsusi təyinatlılardır.</p><p>Son aksiyaların nəticələri nə oldu?</p><p>Birincisi, beynəlxalq ictimaiyyətdən “soyqrım və etnik təmizləmə” adı ilə siyasi, maddi və mənəvi yardım istəyən Ermənistan arzu etdiyi faktları tapmadığı üçün dəstək qazana bilmədi və kəskin siyasi parçalanmaya məruz qaldı. Dünən Azərbaycan xarici işlər naziri dövlətimizin Xankəndiyə humanitar və iqtisadi yardıma hazır olduğunu bildirdi. Ermənilərlə birgəyaşayış üçün hökumətin reinteqrasiya proqramının elan olunması dövlətimizin mövqeyini gücləndirdi.</p><p>İkincisi, humanitar fəlakət, xəstələrin yardımdan məhrum edilməsi, uşaqlara qarşı qəddarlıqla bağlı ənənəvi cəfakeş obrazı və digər antiazərbaycan təbliğatı keçmədi. 4 gündür Xankəndidə qeyri-təbii ölüm faktları qeydə alınmayıb, əksinə, Ermənistan və dünya erməniçiliyi əlini çəkən kimi Qarabağa əmin-amanlıq və dinclik gəlib. Biz dünyaya bəyan etməliyik ki, İrəvana getmək istəyən Xankəndi sakinləri tək bir Laçın yolundan asılı deyillər, 1007 km sərhəddin istənilən yerindən gəlib keçə bilərlər.</p><p>Üçüncüsü, son aksiyalar 30 illik işğalın sadə, əliyalın və ehtiyac içərisində yaşayan ermənilərdən çox, torpaqları istismar edən cinayətkar dəstələr, oliqarx məmurlar, hərbi rejim təmsilçiləri və qızıl-mis sümürgənlərini üzə çıxardı. Azərbacanlıların Xankəndiyə silahsız daxil olması cinayət törətməyən, lakin uzun illər xalqımızın düşmən obrazı ilə qorxudulan yerli ermənilərin də xilasına xidmət edir. Aksiya nəticəsində separatizmin maliyyə mənbələrinə böyük zərbə dəydi. Xatırladaq ki, Qarabağ separatçılarının “büdcə”sinin 35 faizi təkcə Qızılbulaq və Dəmirli yataqlarından formalaşır.</p><p>Nəhayət, Azərbaycan Laçın yolundan keçən bütün nəqliyyat vasitələrinin sayını yaxşı bilir. Təcili-tibbi yardım maşınlarının aylıq intensivliyi 5-ə çatmır. Ona görə də dinc aksiyalar nəticə verəcəkdir - Xankəndi, Xocalı və Şuşa kəndlərinə azərbaycanlıların qayıtması, Laçın yoluna alternativ 32 km-lik yolun son nöqtəsində gömrük məntəqəsinin qoyulması, Zəngəzur dəhlizinin açılması ilə Naxçıvanın 30 illik blokadadan çıxması Xankəndidə və regionda sülhün və təhlükəsizliyin tək şərtidir. 12 dekabr Qarabağ ermənilərinin mühasirəsi yox, Azərbaycanın suverenliyi altında yaşamağa başladıqları gündür”.</p>
<p><strong>Birləşmiş Millətlər Təşkilatı (BMT) kifayət qədər maliyyə olmadığı üçün 2023-cü ilin yanvarında Pakistana ərzaq yardımını dayandıra bilər.</strong></p><p><span class="red"><a target="_blank" href="https://axar.az">Axar.az</a></span> xəbər verir ki, bu sözləri BMT-nin Pakistandakı rezident əlaqələndiricisi Julyen Harnis deyib.</p><p>O bildirib ki, ərzaq dəstəyi proqramını həyata keçirmək üçün 816 milyon dollardan istifadə olunmalıydı. Ancaq yardımın paylanmasına cavabdeh olan BMT qurumları və digər qeyri-hökumət təşkilatları beynəlxalq donorlardan cəmi 262 milyon dollar alıb.</p><p>“Bu, dərin narahatlıq doğurur. Çünki dünyada digər fövqəladə hadisələrə cavab tədbirləri daha yüksək olur. Ancaq biz burada (Pakistanda) oxşar maliyyə almırıq”, - nümayəndə bildirib.</p>
