<p>"Əminəm, ilk günlərdən siz onun şahidi olacaqsınız ki, xalqlarımız arasında təmaslar artır və Azərbaycan xalqı İtaliyanın dost ölkə olduğunu bilir. Bu, vacibdir. Siz bizim ikitərəfli əlaqələrimizin bütün tarixini, bütün vacib hədəfləri bilirsiniz. Əlbəttə ki, strateji tərəfdaşlıq haqqında sənədlərin imzalanması əslində bizim əməkdaşlığın məğzini əks etdirirdi".</p> <p><strong>"MediaPost"</strong>un məlumatına görə, bunu Prezident İlham Əliyev İtaliyanın Azərbaycanda yeni təyin olunmuş səfirinin etimadnaməsini qəbul edərkən deyib.</p> <p>Dövlət başçısı bildirib ki, bu, tərəfdaşlığımızı çox yüksək səviyyəyə qaldırır:</p> <p>"Biz bu çox mühüm siyasi inkişafın praktiki icrasını da görürük. Çünki açıq-aydındır ki, güclü siyasi əlaqələr olmasa biz müxtəlif sahələrdə artıq belə bir böyük tərəqqiyə nail ola bilməzdik. Beləliklə, siyasi dialoq və güclü siyasi əlaqələr müxtəlif sahələrdə əməkdaşlığın təməlini qoyur və bir çox italyan şirkəti Azərbaycanda aktiv fəaliyyət göstərir, ölkəmiz üçün önəmli layihələri həyata keçirir. Bunlar dəyəri milyardlarla dollar olan böyük həcmli layihələrdir. Gələcəkdə də daha çox fürsət olacaq. Əlbəttə ki, biz enerji əməkdaşlığından başladıq, Azərbaycan neftinin təchizatı İtaliyanı bizim ən böyük ticarət tərəfdaşımız edir. Lakin mən ümid edirəm ki, ticarət dövriyyəmizi artırmaq üçün biz başqa sahələri də tapa biləcəyik".</p> <p><a href="https://mediapost.az/xeberler-departamenti">Xəbərlər departamenti</a></p>
<p>Prezident İlham Əliyev Rusiya Federasiyasının Prezidenti Vladimir Putini Rusiya Günü münasibətilə təbrik edib.</p> <p><strong>"MediaPost"</strong>un xəbərinə görə, təbrikdə deyilir:</p> <p>“Hörmətli Vladimir Vladimiroviç.</p> <p>Dövlət bayramınız – Rusiya Günü münasibətilə Sizi və Sizin şəxsinizdə dost Rusiyanın bütün xalqını ürəkdən təbrik edirəm.</p> <p>Rusiya Federasiyası dövlət quruculuğu, davamlı sosial-iqtisadi inkişaf və ictimai həyatın bütün sahələrinin modernləşdirilməsi üçün böyük yol keçib və bu işdə sanballı uğurlar qazanıb. Bu gün Sizin ölkəniz dünyada gedən proseslərin nüfuzlu iştirakçısı kimi aktual çağırışlara və təhdidlərə qarşı mübarizədə mühüm məsələlər həll edir, qlobal və regional sülhün, təhlükəsizliyin dəstəklənməsinə sanballı töhfə verir.</p> <p>Azərbaycan ilə Rusiya arasında möhkəm dostluq, mehriban qonşuluq və qarşılıqlı dəstək ənənələrinə əsaslanan münasibətlərin dinamik və uğurlu inkişafı xüsusi məmnunluq doğurur. Ölkələrimizin ən geniş məsələlər spektrinə dair konstruktiv ikitərəfli dialoqunu və səmərəli əməkdaşlığını da qeyd etmək istərdim.</p> <p>Biz 2020-ci il 10 noyabr və 2021-ci il 11 yanvar tarixli üçtərəfli bəyanatların əldə edilməsində və həyata keçirilməsində Rusiya Federasiyasının vasitəçilik səylərini yüksək qiymətləndiririk. İnanıram ki, Azərbaycan-Rusiya strateji tərəfdaşlığı və çoxplanlı qarşılıqlı fəaliyyəti bundan sonra da səmərəli inkişaf edəcək və dərinləşəcək, xalqlarımızın və ölkələrimizin rifahı, regionda sabitliyin, əməkdaşlığın və tərəqqinin təmin edilməsi naminə yeni məzmun kəsb edəcək.</p> <p>Hörmətli Vladimir Vladimiroviç, bu bayram günündə Sizə möhkəm cansağlığı, xoşbəxtlik və uğurlar, bütün rusiyalılara əmin-amanlıq və firavanlıq arzu edirəm".</p> <p><a href="https://mediapost.az/xeberler-departamenti">Xəbərlər departamenti</a></p>
<p>"Bu gün Azərbaycan ilə Birləşmiş Krallıq arasında münasibətlər müvəffəqiyyətlə inkişaf edir, dostluq əlaqələrimiz gündən-günə genişlənir. Dövlətlərarası münasibətlərimizin formalaşmasında, hərtərəfli inkişafında və bugünkü səviyyəyə yüksəlməsində Sizin böyük rolunuz vardır".</p> <p><strong>"MediaPost"</strong> xəbər verir ki, bu fikirlər Azərbaycan Prezidenti İlham Əliyevin Böyük Britaniya və Şimali İrlandiyanın Kraliçası Ülyahəzrət II Elizabetə ünvanladığı təbrik məktubunda yer alıb.</p> <p>"İnanıram ki, dərin kökləri olan və möhkəm təməllər üzərində qurulmuş bu əlaqələr, bir sıra mühüm sahələrdə əməkdaşlığımız bundan sonra da ardıcıl olaraq inkişaf edəcək və genişlənəcəkdir", - məktubda qeyd olunub.</p> <p><a href="https://mediapost.az/xeberler-departamenti">Xəbərlər departamenti</a></p>
<p>Şəmkir rayon Kür qəsəbəsi Mənzil İstismar Sahəsinin rəisi Vazeh Vəliyev saxlanılıb.</p> <p><strong>"MediaPost" </strong>report-a istinadən xəbər verir ki, V.Vəliyev vəzifə səlahiyyətlərini aşmaqda, tabeçiliyində çalışan qadına qarşı fiziki təsir göstərməkdə ittiham edilir.</p> <p><a href="https://mediapost.az/xeberler-departamenti">Xəbərlər departamenti</a></p>
<p><strong>Bu gündən etibarən "Azərbaycan Hava Yolları" (AZAL) aviaşirkəti Bakı-London-Bakı marşrutu üzrə xüsusi reyslərinin yerinə yetirilməsinə başlayır.</strong></p> <p>Bu barədə <strong>"MediaPost"</strong>a AZAL-dan bildirilib.</p> <p>Qeyd olunub ki, ilk uçuş bu gün saat 12:30-da həyata keçiriləcək. Ümumiyyətlə, sentyabrın əvvəlinədək uçuşlar həftədə bir dəfə "Airbus" təyyarələri ilə yerinə yetiriləcək.</p> <p>Xatırladaq ki, daha əvvəl bu istiqamətdə uçuşların may ayından etibarən başlanması nəzərdə tutulurdu. Lakin London istiqamətində uçuşlara tələbatın aşağı səviyyədə olması ilə əlaqədar reysin açılması iyun ayına keçirilmişdi.</p> <p><a href="https://mediapost.az/xeberler-departamenti">Xəbərlər departamenti</a></p>
<p><strong>Vətən müharibəsi zamanı yaralanan qazilərimiz Əmək və Əhalinin Sosial Müdafiəsi Nazirliyi tərəfindən müasir reabilitasiya vasitələri ilə təmin olunurlar. Bu gün daha 8 nəfərə müasir protezlər təqdim olunub.</strong></p> <p><strong>"MediaPost"</strong>un məlumatına görə, bunu jurnalistlərə açıqlamasında Dövlət Tibbi-Sosial Ekspertiza və Reabilitasiya Agentliyinin İdarə Heyətinin sədr müavini Elxan Əzizov bildirib.</p> <p>Onun sözlərinə görə, bu günə qədər artıq 33 qazi müasir reabilitasiya vasitələri, protezlə təmin olunub: "Yaxın zamanlarda 50 qazi də müasir protezlərlə təmin olunacaq. Hazırda dövlət hesabına təqdim edilən protezlər dünyada bu sahədə ən qabaqcıl olan “Genium” sisteminin - yüksək aktivlik və funksionallıq dərəcəsi olan protezlərin istehsalı sisteminin standartları əsasında hazırlanır. Protezlər elektron oynaq əsasında hərəkətin tam və daha dəqiq tənzimlənməsinə, köməkçi vasitələr olmadan sərbəst addımlamağa, qeyri-bərabər səth və panduslara uyğun və sabit, inamlı hərəkətə, dəyişən məkanlarda və məqamlarda maneəsiz dönməyə imkan yaradır. Proqram təminatı ilə nizamlanan bu protezləri istifadə edən şəxs istədiyi rejimi seçərək onlarla rahat hərəkət imkanı qazanır. Aşağı ətrafları amputasiya olunmuş qazilərlə yanaşı, yuxarı ətrafları amputasiya olunmuş qazilərimizin də son nəsil protezlərlə təminatı üçün işlər davam etdirilir. Bu işlər yüksək texnologiyalı protezləşmə sahəsində ən qabaqcıl dünya təcrübəsinə malik olan İslandiyanın ÖSSUR şirkəti ilə əməkdaşlıq şəraitində aparılır. Şirkətin mütəxəssisləri tərəfindən təlimlər keçirilərək müvafiq sahədə ən müasir dünya təcrübəsi öyrənilib, həmçinin yuxarı ətrafları amputasiya olunmuş 32 nəfər qazimizdən müvafiq ölçülər götürülüb".</p> <p>Qeyd edək ki, bu gün protezlə təmin olunan qazilərimiz Samid Xudadlı, Ramiz Qasımov, Sərxan Quliyev, Elşən Həmidov, Asim Məmmədbəyov, Bəşir Məmişov, Hüseyn Sadıqov, Ceyhun Camalovdur.</p> <p><a href="https://mediapost.az/xeberler-departamenti">Xəbərlər departamenti</a></p>
<p>İyunun 11-dən 14-dək Bakıda və Abşeron yarımadasında şimal-qərb küləyinin 15-18 m/s, 12-si səhər yarımadanın bəzi yerlərində arabir 20 m/s-dək güclənəcəyi gözlənilir. </p> <p>Bu barədə Milli Hidrometeorologiya Xidmətindən <strong>"MediaPost"</strong>a məlumat verilib. Bildirilir ki, iyunun 14-dək Azərbaycanın əsasən şimal və qərb rayonlarında qeyri-sabit hava şəraitinin davam edəcəyi, bəzi yerlərdə şimşək çaxacağı, fasilələrlə yağış yağacağı, ayrı-ayrı yerlərdə leysan xarakterli intensiv olacağı, dolu düşəcəyi gözlənilir. Qərb küləyi əsəcək, ayrı-ayrı yerlərdə arabir 18-23 m/s-dək güclənəcək.</p> <p>Çaylarda sululuğun artacağı, bəzi dağ çaylarından qısamüddətli daşqın və sel keçəcəyi ehtimal olunur.</p> <p><a href="https://mediapost.az/xeberler-departamenti">Xəbərlər departamenti</a></p>
<p>Daha bir xəstəxanada əməkhaqqı kartları ilə bağlı növbəti maxinasiya ifşa edilib.</p> <p><strong>"MediaPost"</strong>un xəbərinə görə, bu barədə Baş Prokurorluğun mətbuat xidmətinin məlumatında bildirilir.</p> <p>Məlumata görə, 23 saylı Birləşmiş Şəhər Xəstəxanasının baş həkiminin iqtisadi məsələlər üzrə müavini Zinyət İsmayılovanın qanunsuz əməlləri ilə əlaqədar keçirilmiş əməliyyat-axtarış tədbirləri nəticəsində Baş prokuror yanında Korrupsiyaya qarşı Mübarizə Baş İdarəsində Cinayət Məcəlləsinin müvafiq maddələri ilə cinayət işi başlanıb.<br /> Aparılmış istintaq-əməliyyat tədbirləri ilə Zinyət İsmayılovanın 13 aprel 2021-ci il tarixədək xəstəxananın baş həkimi vəzifəsində işləmiş Rəsul Baxşəliyevlə cinayətkar əlaqəyə girərək 2015-ci ildən etibarən xəstəxanada ayrı-ayrı vəzifələrdə işləmiş tibb işçilərinin əmək stajının hesablanması yolu ilə işə gəlməmələrinə şərait yaradılması müqabilində sonuncuların əmək haqqı kartlarını özündə saxlamaqla, kart hesablarına mədaxil olunan ümumilikdə 314 min 400 manat məbləğində pul vəsaitini hər ay nağdlaşdıraraq öz aralarında bölmələrinə əsaslı şübhələr müəyyən edilib.<br /> Bundan başqa, Zinyət İsmayılovanın 13.04.2021-ci il tarixdən hazırki dövrədək həmin müəssisənin baş həkimi vəzifəsində işləyən Ceyhun Yusifovla birlikdə eyni cinayətkar üsul ilə həmin işçilərə məxsus cəmi 13 min 800 manat məbləğində pul vəsaitini hər ay nağdlaşdırararaq öz aralarında bölmələrinə əsaslı şübhələr müəyyən olunub.<br /> İstintaq zamanı vurulmuş maddi ziyanın 112 min manat hissəsinin dövlət büdcəsinə ödənilməsi təmin edilib.</p> <p>Hazırda cinayətlərin törədilməsində hər-hansı formada iştirak etmiş digər şəxslərin dairəsinin müəyyənləşdirilməsi və vurulmuş maddi ziyanın qalan hissəsinin ödətdirilməsi istiqamətində istintaq tədbirləri davam etdirilir.</p> <p><a href="https://mediapost.az/xeberler-departamenti">Xəbərlər departamenti</a></p>
<p>“Vaksin iki dozada vurulur. Peyvəndin ikinci dozasını 56 günə qədər vurdurmaq olar”.</p> <p><strong>"MediaPost"</strong>un məlumatına görə, bunu Səhiyyə Nazirliyinin nəzdində fəaliyyət göstərən işçi qrupun üzvü Nailə Daşdəmirova "COVID-19 Sertifikatı" mövzusunda çıxışında deyib.</p> <p>O bildirib ki, müəyyən səbəblər olubsa və həmin şəxs 28 gün sonra peyvənd vurdura bilməyibsə, o zaman peyvəndi vurdurmaq mümkündür: “Əgər ikinci dozanı vurdurmaq 56 günü keçibsə, o zaman həmin şəxs 6 aydan sonra yenidən 1 və 2-ci doza vaksin almalıdır”.</p> <p><a href="https://mediapost.az/xeberler-departamenti">Xəbərlər departamenti</a></p>
<p><strong>Xalq artisti Ramiz Əzizbəyli dəfn olunub.</strong></p> <p><strong>"MediaPost"</strong>un məlumatına görə o, Qaradağ rayonu "Qurd qapısı" qəbiristanlığında torpağa tapşırılıb.</p> <p>Dəfn mərasimində R.Əzizbəylinin ailə üzvləri, yaxınları, sənət dostları iştirak ediblər.</p> <p>Qeyd edək ki, Xalq artisti iyunun 9-u axşam vəfat edib. O, bir müddət öncə koronavirus (COVID-19) diaqnozu ilə xəstəxanaya yerləşdirilmişdi.</p> <p><a href="https://mediapost.az/xeberler-departamenti">Xəbərlər departamenti</a></p>
<p><strong>Azərbaycana daha 40 min doza “Sputnik V" vaksini gətirilib.</strong></p> <p>Bu barədə <strong>"MediaPost"</strong>a Səhiyyə Nazirliyindən bildirilib. Məlumata əsasən, Azərbaycanda “Sputnik V” vaksininin istifadəsinə mayın 18-dən başlanılıb. İndiyədək ümumilikdə 80 min doza “Sputnik V” peyvəndi ölkəyə gətirilib.</p> <p>Qeyd edək ki, İcbari Tibbi Sığorta üzrə Dövlət Agentliyi ilə Rusiyanın “HUMAN VACCINE” MMC Şirkəti arasında imzalanmış dərman vasitəsinin tədarükünə dair təchizat sazişinə əsasən, 300 000 doza “Sputnik V” dərman vasitəsi Azərbaycana gətiriləcək. İlk partiya 40 min doza vaksin isə mayın 2-də Azərbaycana gətirilmişdi.</p> <p><a href="https://mediapost.az/xeberler-departamenti">Xəbərlər departamenti</a></p>
<p>Bu gündən Azərbaycanda iri ticarət mərkəzlərinin və “Mall”arın fəaliyyətinə icazə verilir.</p> <p><strong>"MediaPost"</strong>un xəbərinə görə, bu barədə Nazirlər Kabinetinin “Xüsusi karantin rejiminin müddətinin uzadılması və bəzi məhdudiyyətlərin aradan qaldırılması ilə bağlı tədbirlər barədə” qərarında əks olunub.</p> <p>Qərara əsasən, iri ticarət mərkəzlərinin nəzdindəki uşaq və digər əyləncə mərkəzlərinin, kinoteatrların fəaliyyətinə icazə verilməyəcək.</p> <p><a href="https://mediapost.az/xeberler-departamenti">Xəbərlər departamenti</a></p>
<p><strong>Türkiyə Prezidenti Rəcəb Tayyib Ərdoğan Milli Məclisin Azərbaycan-Türkiyə parlamentlərarası dostluq qrupunun sədri Əhliman Əmiraslanovun başçılıq etdiyi nümayəndə heyəti ilə görüşüb.</strong></p> <p><strong>"MediaPost"</strong>un məlumatına görə, bu barədə Türkiyə Prezident Administrasiyasının “Twitter” hesabında məlumat verilib.</p> <p>Məlumatda bildirilib ki, Prezident Ərdoğan Azərbaycan Milli Məclisi Türkiyə-Azərbaycan Dostluq Qrupu heyəti ilə Türkiyə Böyük Millət Məclisində bir araya gəlib.</p> <p><a href="https://mediapost.az/xeberler-departamenti">Xəbərlər departamenti</a></p>
<p>İyunun 9-da Müdafiə Nazirliyində Azərbaycan Respublikası Silahlı Qüvvələrinin Baş Qərargah rəisinin müavini - Əməliyyat Baş İdarəsinin rəisi general-leytenant Ayaz Həsənov Pakistan Ordusunun Hərbi Əməliyyat Baş İdarəsinin rəisi general-mayor Nauman Zakarianın rəhbərlik etdiyi nümayəndə heyəti ilə görüşüb.</p> <p>Bu barədə <strong>"MediaPost"</strong>a Müdafiə Nazirliyindən məlumat verilib.</p> <p>Tərəflər hər iki ölkə ordularının müxtəlif qoşun növləri və bölmələri arasında əməliyyat uyarlığının təmin edilməsi, birgə əməliyyat təlimlərinin planlaşdırılması və keçirilməsinə dair fikir mübadiləsi aparıb, həmçinin qarşılıqlı maraq doğuran digər məsələləri müzakirə ediblər.</p> <p><a href="https://mediapost.az/xeberler-departamenti">Xəbərlər departamenti</a></p>
<p>Prezident İlham Əliyev "Xaçmaz, Quba, Qusar və Şabran rayonlarında əkin sahələrinin suvarma suyu ilə təminatının yaxşılaşdırılmasına və əhalinin içməli suya tələbatının ödənilməsinə dair əlavə tədbirlər haqqında" Sərəncam imzalayıb.</p> <p><strong>"MediaPost"</strong>un məlumatına görə, Sərəncama əsasən Xaçmaz, Quba, Qusar və Şabran rayonlarının əhalisi 17346 nəfər olan 13 yaşayış məntəqəsində (siyahı əlavə olunur) əkin sahələrinin və əkin üçün istifadə olunan həyətyanı torpaq sahələrinin suvarma suyu ilə təminatının yaxşılaşdırılması, habelə əhalinin içməli suya tələbatının ödənilməsi üçün 13 ədəd subartezian quyusunun layihələndirilməsi və qazılması məqsədilə “Azərbaycan Respublikasının 2021-ci il dövlət büdcəsində dövlət əsaslı vəsait qoyuluşu (investisiya xərcləri) üçün nəzərdə tutulan vəsaitin bölgüsü”nün 1.8.8-ci yarımbəndində göstərilmiş məbləğin 910,0 (doqquz yüz on) min manatı Azərbaycan Meliorasiya və Su Təsərrüfatı Açıq Səhmdar Cəmiyyətinə ayrılıb.</p> <p>Maliyyə Nazirliyi bu Sərəncamın 1-ci hissəsində göstərilən məbləğdə maliyyələşməni təmin, Nazirlər Kabineti bu Sərəncamdan irəli gələn məsələləri həll etməlidir.</p> <p><a href="https://mediapost.az/xeberler-departamenti">Xəbərlər departamenti</a></p>
<p>"Azərbaycan-Ermənistan sərhədində baş verənlərin Dağlıq Qarabağa heç bir aidiyyəti yoxdur".</p> <p><strong>"MediaPost" </strong>xəbər verir ki, bu barədə Rusiyanın Xarici İşlər naziri Sergey Lavrov “Primakov qiraətləri” forumunda çıxışı zamanı bildirib.</p> <p>“Müharibəni kim aparıb, kim döyüşüb məsələsi bizim üçün və bütün sağlam düşüncəli insanlar üçün bağlıdır. Qan tökülməsi dayandırılıb. Müharibə tez bitə, sülhə tez nail oluna bilərdi. Biz vasitəçi olmuşuq. Biz tərəfləri məcbur edə bilməzdik. Biz əmin edirdik ki, bundan sonra qan tökülməsi mənasızdır və olduqca təhlükəlidir. İndi bizim sülhməramlılar öz mandatını icra edirlər. Hansısa böyük insidentlər ümumiyyətlə yoxdur. Bunu Bakıda və İrəvanda da etiraf edirlər. Baş verən kiçik maneələr olduqca tez aradan qaldırılır. Bəli, Azərbaycan-Ermənistan sərhədinin ayrı məntəqələrində gərginlik var. Bunun Dağlıq Qarabağa aidiyyəti yoxdur”, - deyə nazir qeyd edib.</p> <p><a href="https://mediapost.az/xeberler-departamenti">Xəbərlər departamenti</a></p>
<p><strong>Hindistanda ağır yol-nəqliyyat hadisəsi baş verib. </strong></p> <p><strong>"MediaPost"</strong> xəbər verir ki, ölkənin Uttar-Pradeş ştatında avtobusla yük avtomobili toqquşub. Hadisə nəticəsində 17 nəfər həlak olub, 5 nəfər yaralanıb.</p> <p>Hindistanın Baş naziri Narendra Modi ölənlərin yaxınlarına başsağlığı verib və lazımlı dəstək göstəriləcəyini bildirib.</p> <p><a href="https://mediapost.az/xeberler-departamenti">Xəbərlər departamenti</a></p>
<p><strong>“Kristal Abşeron”la bağlı şikayətlər mütəmadi olaraq gündəmə gəlir. Adətən şirkətin inşa etdiyi binalarda keyfiyyətsiz məhsullardan istifadə edildiyi deyilir. Son zamanlar isə ipoteka ilə ev alan insanlar arasında tikinti şirkəti ilə bağlı narazılıq hallarına daha çox rastlanılır. Belə vətəndaşlardan biri də Elnarə Mikayılovadır.</strong></p> <p><strong>"MediaPost" </strong>azadinfo.az-a istinadən xəbər verir ki, Elnarə xanım 2015-ci ilin oktyabr ayında "Kristal Abşeron”dan Xırdalanda 10 illik müqavilə ilə ev alıb. İlkin ödəniş olaraq 8 min manat vəsait köçürüb, aylıq ödənişin məbləği isə 914 manat təyin edilib. Lakin dollarla bağlı devalvasiyanın yaşandığı dövrdə Elnarə Mikayılova işini itirdiyi üçün ödənişdə 2 700 manat gecikmə yaranıb. Onun sözlərinə görə, bu səbəblə "Kristal Abşeron” Elnarə Mikayılovaya kredit müddətini uzatmağı təklif edib:</p> <p>"Mən də razılaşıb müddət uzatmaq üçün rəsmi müraciət elədim. Yeni ödəniş cədlvəli tərtib olundu və müddəti 20 il etdilər. 2016-cı ilin avqust ayından başlayaraq hər ay 645 manat ödədim. Həmçinin həmin vaxt mənə müddətuzatma ilə əlaqədar 2 700 manat gecikmənin 1 100 manat faizini ödətdirdilər. Bildirdilər ki, bunu ödədikdən sonra 2 700 manat əsas məbləğin üzərinə əlavə olunacaq və mən hər ay sadəcə 645 manat ödəyəcəm. Lakin bu hadisədən sonra onlar mütəmadi olaraq mənə gecikməni ödəməli olduğumla bağlı zəng vurmağa başladılar. Gedib 1 100 manat ödəniş etdiyimi və razlığa əsasən, həmin vəsaitin ümumi məbləğə əlavə olunduğunu deyib, sənədləri, təzə cədvəli göstərsəm də, heç bir tədbir görülmədi. Bir il məni həmin məbləğin gecikmə siyahısından silinəcəyini deyərək aldatdılar. Sonra isə sistemdə qaldığını, silinmədiyini bildirdilər. Daha sonra valideynlərimin sağlamlıq problemləri ilə əlaqədar istəməsəm də, mütəmadi gecikmələr baş verdi. Beləliklə, real olaraq 2 300 manat yeni gecikmə yarandı. Onlara valideynimi itirdiyimi, bu səbəblə gecikmə olduğunu bildirmişdim. Bir neçə ay sonra təkrar əvvəlki qaydada ödənişləri həyata keçirdim, hətta gecikməni bağlamaq üçün Beynəlxalq Banka 645 manatdan əlavə də vəsait köçürürdüm. Ancaq nəticə olaraq mənə 7 min gecikməm olduğunu dedilər. Sənəd olaraq isə mənə müddət uzatma zamanı silinməli olan 2 700 manatı göstərdilər. Keçən il may ayının 4-də aylıqdan əlavə 2 min manat ödəniş elədim. Həmçinin bütün pandemiya dövründə də aylıq borcları tam ödəmişəm. Onlar isə mənə "Bu ödəniş deyil”,-deyirlər”.</p> <p>Həmsöhbətimiz yaranmış problemin aradan qaldırılması üçün həm Beynəlxalq Bankın bütün şöbələrinə, həm də "Kristal Abşeron”a müraciət etdiyini, lakin əsaslı açıqlamanın verilmədiyini diqqətə çatdırıb:</p> <p>"Mən ay ərzində bəzən 650, bəzən 800-1000 manat ödəniş edirəm, lakin borcdan çıxmırlar, məbləği daha da artırırlar. Bu dəqiqə 5 200 manat gecikməm olduğunu deyirlər, halbuki 2 300 manatdır. Problemlərə baxan şöbə indiyədək ödədiyim bütün vəsaitin faizə getdiyini bildirir. İndiyədək 69 min manatın 36 minini ödəmişəm, əlimdə çıxarış da var, amma mənə cəmi 7 min manat köçürdüyümü, qalan pulun isə faizə çıxıldığını deyirlər. Üstəlik məhkəməyə müraciət edirlər ki, ev hərraca qoyulub satılsın. Amma onların fikrincə, tutaq ki, ev 50 minə satılsa, yerdə qalan 12 min manatı da mən ödəməliyəm. İyun ayının 2-si üçün məhkəmə təyin olunub. Lakin "Kristal Abşeron” indidən özlərindən qərar çıxarıb. Qurumun əməkdaşı Günay xanım sevinə-sevinə Elmir müəllimə məhkəmənin evin hərraca qoyulması ilə bağlı qərar verdiyini deyib. Bu barədə mənə bir şəxs məlumat verdi. Hadisə mayın 16-da baş tutub, halbuki məhkəmə iyunun 2-də olacaq. Necə ola bilər ki qərar verilsin? Bu şirkət özündən qərar çıxarır. Mənə 8 min manat təklif edirlər ki, evi onlara qaytarım. İki ildir ki, hər ay işıq borcum olmadığı halda, 3-5 dəfə işıqlarımı söndürüblər. Körpə uşaqlarım qaranlıqda qalıb. "Yandırmayacam, get, kimə istəyirsən şikayət et”,-deyirlər. Hər dəfə işığımı söndürəndə ödəniş edirəm, yandırırlar, amma o ödənişi də faizə hesablayırlar. Maraqlarının nədən ibarət olduğunu bilmirəm”.</p> <p>Elnarə Mikayılova bu kimi hadisələri "Kristal Abşeron”un binasında yaşayan başqa ailələrin də yaşadığını vurğulayıb:</p> <p>"Şirkətin sahibi, Milli Məclisin deputatı Ağalar Vəliyevə rəsmi məktub göndərmişəm. Hələ də cavab yoxdur. Yaxın zamanda mən oğlumu əsgər göndərəcəm. Oğlum əsgərlikdə ana-bacısının evdən çıxarıldığını eşidib özünü öldürsə, buna kim cavab verəcək? Hələ mənə əxlaqsız məsləhətlər verirlər ki, tək olmaqdansa, kimisə tapardın, ödənişini edərdi. Elmir müəllim mənə gülərək bankın mexaniki səhv etdiyini, guya borcu mənə yazmaqdansa, banka yazıldığını deyir. Əgər mənim bankla problemim varsa, niyə işığımı "Kristal Abşeron” söndürür? Halbuki heç onlarla problem yoxdur. Ötən gün "Azərişıq”a zəng etdim, oradan borcumun olmadığı və işığı onların söndürmədiyi bildirildi. Komendant mənə Kristal Abşeronun problemlərlə əlaqəli şöbəsində işləyən Günay xanımın söndürtdüyü dedi. Polisə zəng vurdum, 12 polis gəldi, işıq yanmırdı, Günay xanım isə həmin an üzə durub işığın yandığını iddia etdi. İnsanı canından bezdirirlər. Məsələnin həllini tapmaq üçün Prezident Administrasiyasına da, Mehriban Əliyevaya da məktub göndərmişəm. Xahiş edirəm, bu məsələ işıqlandırılsın, bir tədbir görülsün”.</p> <p>Qeyd edək ki, “Kristal Abşeron” MTK-nın rəhbəri millət vəkili Ağalar Vəliyevdir.</p> <p><a href="https://mediapost.az/xeberler-departamenti">Xəbərlər departamenti</a></p>
<p>Dövlət Tibbi-Sosial Ekspertiza və Reabilitasiya Agentliyinin həkim-ekspertinə qarşı xuliqanlıq faktı üzrə cinayət işi başlayıb.</p> <p>DİN-in Mətbuat Xidmətindən <strong>"MediaPost"</strong>a verilən məlumata görə, Bərdə rayon sakini, 1963-cü il təvəllüdlü Şamayıl Mustafayev heç bir səbəb olmadan ictimai qaydanı kobud surətdə pozaraq agentliyin həkim-ekspertini yumruqla vuraraq ona müxtəlif dərəcəli yüngül bədən xəsarətləri yetirib.</p> <p>İstintaq tədbirlərilə hadisə yerinə baxış keçirilib, xəsarət alan həkim-ekspert zərərçəkmiş şəxs qismində tanınıb, məhkəmə tibb ekspertizasının rəyi və şahidlərin ifadələri alınıb.</p> <p>Binəqədi RPİ-nin İstintaq şöbəsində Cinayət Məcəlləsinin 221.1-ci (Xuliqanlıq) maddəsilə başlayan cinayət işi üzrə istintaq hərəkətləri davam etdirilir.</p> <p><a href="https://mediapost.az/xeberler-departamenti">Xəbərlər departamenti</a></p>
<p>Prezident İlham Əliyev Bakı şəhərinin Pirallahı rayonu ərazisində avtomobil yollarının yenidən qurulması işlərinin davam etdirilməsi ilə bağlı əlavə tədbirlər haqqında sərəncam imzalayıb.</p> <p><strong>"MediaPost"</strong>un xəbərinə görə, sərəncama əsasən, Bakı şəhərinin Pirallahı rayonu ərazisində avtomobil yollarının yenidən qurulması işlərinin davam etdirilməsi məqsədilə “Azərbaycan Respublikasının 2021-ci il dövlət büdcəsində dövlət əsaslı vəsait qoyuluşu (investisiya xərcləri) üçün nəzərdə tutulan vəsaitin bölgüsü”nün 1.1.14-cü yarımbəndində göstərilmiş məbləğin 660,0 (altı yüz altmış) min manatı Azərbaycan Avtomobil Yolları Dövlət Agentliyinə ayrılıb.</p> <p>Maliyyə Nazirliyi bu sərəncamın 1-ci hissəsində göstərilən məbləğdə maliyyələşməni təmin, Nazirlər Kabineti bu sərəncamdan irəli gələn məsələləri həll etməlidir.</p> <p><a href="https://mediapost.az/xeberler-departamenti">Xəbərlər departamenti</a></p>
<p>İyunun 8-də Ermənistan-Azərbaycan dövlət sərhədinin Laçın rayonu sahəsində əlverişsiz hava şəraitindən istifadə edən Ermənistan silahlı qüvvələrinin kəşfiyyat-diversiya qrupu ərazimizə daxil olub.</p> <p>Müdafiə Nazirliyindən <strong>"MediaPost"</strong>a verilən məlumata görə, Azərbaycan Ordusunun bu istiqamətdə yerləşən bölmələrinin sayıqlığı nəticəsində qrupun bir üzvü, hərbi qulluqçu Artur Kartanyan saxlanılıb. Qrupun digər üzvləri geri çəkilərək ərazini tərk edib.</p> <p>Diversantın saxlanıldığı ərazinin koordinatları: X8610021, Y4387428.</p> <p>İlkin araşdırmalara görə, düşmənin kəşfiyyat-diversiya qrupunun tapşırığı ərazilərimizin minalanması olub.</p> <p>Hazırda qrupun saxlanılan üzvü haqqında məlumatlar dəqiqləşdirilir.</p> <p><a href="https://mediapost.az/xeberler-departamenti">Xəbərlər departamenti</a></p>